Vouiquipèdia:Lumiére dessus…/Mordavia
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demécro 03 d’oût 2022 tant qu’a la demenge 07 d’oût 2022.
La Mordavia [mɔr.da.ˈvja] ou ben la Mordavie [mɔr.da.ˈvi] (Moldova orientală [mol.ˈdo.va] en roumen per difèrence de la Moldova occidentală qu’est a la Roumania ; Молдавия, Moldaviya [mɐɫ.ˈda.vʲɪ.jə] en russo), en fôrma longe rèpublica de Mordavia (Republica Moldova en roumen, Республика Молдова, Respublika Moldova [mɐɫ.ˈdo.və] en russo, de yô que vint la varianta rèpublica de Mordova) est un payis d’Eropa levantenche, encllavâ entre-mié la Roumania et l’Ucrèna, qu’engllobe de parties de les règions historiques de Bèssarabia et de Podolia enversenche (déta Transnistria). Sos cârros valonâs que compregnont de bouescs, de tèrres curtivâyes, de zones humides et pués de vegnôblos. Sa capitâla est Chișinău.
La partia du tèrritouèro mordâvo d’ora que sè trôve sus la riva drêta du Dnièstre ére avouéc la principôtât de Mordavia (tributèro de l’Empiro otoman dês 1538), dês lo XIVémo siècllo tant qu’a 1812, dâta que lyé fut cèdâye a l’Empiro russo. Ceti nen fit son « govèrnament de Bèssarabia » et y organisat na colonisacion qu’entrênâve l’enstalacion de tot plen de populacions ôtres que los Mordâvos, que réstéront portant majoritèros.