Vouiquipèdia:Lumiére dessus…/Lôza
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo dejô 13 d’octobro 2022 tant qu’u delon 17 d’octobro 2022.
La lôza [ˈluː.za] — ou oncor la lâbia [laː.ˈbja] ou ben la lâbie [laː.ˈbjə] en Vâl d’Aoûta, pués la lèssa [leːs] en Bâssa Vâl et na partia du Valês Centrâl — est na piérra plata empleyêe por lo cuvèrt des têts. Les roches sèdimentères sont brâvament empleyêes dedens lo Sud-Ouèste et lo Centro de la France, notament la piérr’a chôlx et lo grês, pendent que les roches mètamorfiques rempôrtont la prèference de les règions de montagne (Savouè, valâye de Suisa, Tèssin, Valês Centrâl, Vâl d’Aoûta, valâyes que surplombont la règion de Coni por citar ren que cetes). O est diu u vesenâjo de difèrents tipos de roches disponibles. Granit, calc-chisto (déta de Bèrgam), ortogneiss (déta de Lusèrna) vêr quartsita (déta de Norvège) ant la prèference dedens les Ârpes et ôtros massis de montagnes.
La surface importanta per rapôrt a l’èpèssior est gâgnêe gènèralament per cllivâjo (piérra chistosa) et pués empleyêe surtot por los têts et los pavês.