Sant-Savétro

Velyê de doux ans, Nuet de la Sant-Savétro

Cél articllo est ècrit en arpetan supradialèctâl / ORB lârge.

Cèlèbracion de la Sant-Savétro 2005 a Sydney.

La Sant-Savétro [sã.sa.ˈve.tro, sã.sa.ˈve.tʀo] (le réveillon de la Saint-Sylvestre en francês) — diont pletout la velyê de doux ans [və.ˌʎa.də.du.ˈz‿ã] (la vigilia di Capodanno en étalien) ou ben la nuet de la Sant-Savétro [ˌne.də.la.sã.sa.ˈve.tro, ˌne.də.la.sã.sa.ˈve.tʀo] (la notte di San Silvestro en étalien, la nit de Cap d’any en catalan) — est na môda qu’est de fétar l’arrevâ de l’an novél, en velyent tant qu’à mié-nuet la nuet du 31 de dècembro, dèrriér jorn de l’an du calendriér grègorien, jorn tegnu per l’Égllése catolica por cèlèbrar lo papa Savétro I^ér.

Dens la plepârt des payis, contrèrament a la velyê de Chalendes que sè féte surtot en famelye, celi du jorn de l’an sè pôt fétar en famelye ou ben avouéc d’amis. D’ense, u Japon, en Colombia, en Argentina et pués en Urugoay, la nuet de la Sant-Savétro sè féte tradicionalament en famelye. En Russia et dens les ôtres vielyes rèpubliques soviètiques, la velyê de doux ans est fétâye en rassemblent la famelye et los amis prôchos.

A côsa du dècalâjo horèro, les iles de la Legne (la partia de Kiribati u ponant de la legne entèrnacionâla de changement de dâta) et les iles Samoa (celes que sont endèpendentes) sont los fins premiérs endrêts a fétar l’an novél et pués passar dens l’an novél pendent que les Samoa amèriquènes sont lo fin dèrriér endrêt a lo fâre.

Enqu’houé, la Sant-Savétro est fétâye dedens quâsi tôs los payis du mondo. Y at doux-três èxcèpcions coment l’Arabia saoudita que la police religiosa fât rèspèctar lo calendriér islamico. Dens quârques payis, l’an civilo comence lo 1^ér de janviér mas la populacion âme mielx fétar l’an novél tradicionâl coment en China continentâla ou ben en Enda.

Vêre avouéc

Articllos liyês

• lo jorn de l’an ;
• Sant Savétro.

Notes et rèferences

Rèferences

— Principâles

1. (fr) Rogiér Verèt, Dikchonéro Fransé - Savoyâ - Dictionnaire Français - Savoyard [PDF], 10^éma èdicion reviua et ôgmentâ, 2023, pp. 1193 [→ la vèlyà d’douz an et la né d’la San-Savétre, por la né d’la San-Savétro] et 3372 [→ la San-Savétro].