Mont Iseran

Cél articllo z-est ècrit en arpetan savoyârd / ORB lârge.

Lo mont Iseran est lo nom d'un grant sonjon de lègenda de 4 045 mètros aparu sur les cârtes et dèscripcions de la Savouè dês la fin du XVIIémo sièclo, et que sè serêt situâ ux sôrses de l'Isera, pas luen de l'actuèl col de l'Iseran entre les valâs de la Tarentèsa et de la Môrièna. Endicâ a més de 4 000 m sur les cârtes d'Ètat-major, fôt atendre los ans 1860 et l'âjo d'or de l'arpinismo por que los voyagiors britanicos constatont qu'il ègziste gins de grant sonjon dens los parâjos, et que l'apèlacion locala de Mont-Iseran dèsigne solament lo col.

Lo mont Iseran sur la cârta des Ètats de Savouè de Giovanni Tommaso Borgonio (1680).