De rerum natura

Cél articllo est ècrit en arpetan supradialèctâl / ORB lârge.

De rerum natura (en arpetan : De la natura de les chouses), quâsi tot lo temps apelâ De natura rerum, est un grant poèmo en lengoua latina du poèto filosofo latin Lucrècio, que vivét u premiér siècllo devant noutron èra. Composâ de siéx lévros qu’ant dedens 7 400 hègzamètros dactilicos, mètro cllassico empleyê tradicionalament por lo genro èpico, constitue na traduccion de la doctrina d’Èpicuro.

Lo poèmo sè presente coment na tentativa d’« ècllapar los fôrts vèrrolys de les pôrtes de la natura », cen vôt dére de fâre vêre u liésor la natura du mondo et des fenomènos naturâls. D’aprés Lucrècio, que s’enscrit dedens la tradicion èpicurièna, cela cognessence du mondo dêt pèrmetre a l’homo de sè libèrar du fèx de les supèrsticions, notament religioses, que constituont tant d’encoblos qu’empachont châcun d’avengiér l’ataraxia, cen vôt dére la tranquilitât de l’ârma. « Y at de sûr gins de més brâvo poèmo scientifico que lo De Natura Rerum. » cen deséve Bayet.

L’èpicurismo dens la Roma antica

Ben que cognéssont pou de chouses sus la via de Lucrècio et pués mémo se des dôbtos réstont por cen qu’est lo temps que lui vivéve, pôvont comprendre qu’o ére un temps de troblos politicos, marcâ per de massacros (massacros de Marius), de dictatures (Silâ, dês -82 tant qu’a -79), de rebênes d’èscllâvos durament rèprimâyes (rebêna de Spartacus, dês -73 tant qu’a -71), ou ben adés tot plen de guèrres violentes.

L’histouère de Roma est marcâye a cél temps per na crise de les valors tradicionâles, coment cela de la grant-idê de virtus que prône lo corâjo, la loyôtât et la moderacion, que sè trôve sovent mèprisiêe et dèdéta. Portant cela grant-idê, sotegnua per los stôiciens, avéve tant qu’ique cimentâye la sociètât.

D’alyor, l’enflluence de la cultura grèca sus la cultura romèna est des côps vivua coment un revenjo des vencus (Grècos) sus los vencors (Romens), cen qu’èxplique la rèsistence rencontrâye per celos qu’èprovéront d’èpatar la doctrina èpicurièna a Roma. Mas celes rèsistences ant pas empachiê la doctrina èpicurièna de s’èpatar, notament dedens lo mondo nôblo, et més particuliérement dedens la règ·ion de la Campania. Lo novél de Lucrècio, coment lo bete en valor Cicèron, est d’èpatar cela doctrina desot la fôrma d’una brâva poèsia, et pas, d’aprés los tèrmos de Cicèron, « sen gins d’ârt », « sen prècision, sen ôrdre et pués sen ornament », coment l’avévont fêt tant qu’ique los prèdècèssors de Lucrècio.

D’Èpicuro a Lucrècio : la nocion de traduccion

Lucrècio at pas la prètencion de lanciér de novéls concèptos, mas de traduire Èpicuro, cen vôt dére, d’aprés la vielye dèfinicion du mot traducere, de balyér lo sistèmo èpicurien, adonc viely per-que doux siècllos. O est notâblo qu’u moment des troblos politicos, o est la doctrina de l’èpicurismo, que prône un replê avouéc sè por èchapar a les pèrturbacions de la politica, que sè bete a prèvalêr dessus cela du stôicismo, qu’en apelâve arriér-més a la participacion (meserâye et a bon èscient) du sâjo a les afâres de la citât.

L’originalitât subvèrsiva d’Èpicuro, de son temps, ére de glorifiar l’endividualismo drêt que les ôtres doctrines èlevâvont la « vèrtu » — que passâve per les afâres publiques, ou ben du muens los lims avouéc los ôtros citoyens — en qualitât morâla endispensâbla. Èpicuro refuse cél idèalismo morâl, en afirment que lo bonhor est fêt ren que d’absence de dolor et de troblos. « Cracho dessus la moralitât et pués dessus les carcanes admiracions que lyé balyont, quand fât gins de plèsir » cen dècllâre-t-il. Lo principâl critèro de veretât de sa doctrina est vêr la sensacion, et la morâla at por fin de dèfenir los moyens d’arrevar durâblament u plèsir. Por cen qu’est la fesica, dêt dissipar los « tèrrors et la nuet nêre de l’èsprit ».

Lo stilo d’Èpicuro ére d’una tècnicitât qu’en rendéve la lèctura mâlésiêe. Dens sa traduccion de cen qu’il apèle lui-mémo un « sujèt obscur », Lucrècio rèstitue desot na fôrma poètica cen qu’il at possu teriér de tèxtos de son mêtro : o est ’n imitator originâl, que sen lui la doctrina èpicurièna serêt pôt-étre pas étâye promêsa a l’avegnir qu’el at cognu.

Lo rolo de Lucrècio dens la difusion de la doctrina èpicurièna est d’atant ples grant que quârques pouents de la doctrina d’Èpicuro figurâvont pas dedens los tèxtos de ceti qu’ant possu étre consèrvâs : d’ense lo concèpto de cllinamen ou ben « dècllinèson », dèviacion minimon des atomos qu’èxplique la formacion du mondo et de la matiére, sè trôve ren que dedens lo De natura rerum. Et ben sûr, cél concèpto est particuliérement important puésque, pas content de formular la constitucion d’un mondo feni dedens l’univèrs enfeni, garantét la libèrtât de l’homo, son èlan vitâl, ben que la dèviacion minimon et spontanâye que subéssont los atomos est règia per l’hasârd, et pas per un sé-quint dètèrmenismo.