Vouiquipèdia:Lumiére dessus…/Cipro (payis)

Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês la demenge 15 de dècembro 2024 tant qu’u dessando 21 de dècembro 2024.

Cipro [ˈsi.pro, ˈsi.pʀo], en fôrma longe la rèpublica de Cipro (en grèco : Κύπρος, Kýpros [ˈci.pɾos] et Δημοκρατία της Κύπρου, Dimokratía tis Kýprou ; en turco : Kıbrıs [ˈkɯb.ɾɯs] et Kıbrıs Cumhuriyeti), est ‘n Ètat que sè trôve sus l’ila de Cipro en Asia, dens la partia levantenche de la mar Mèditèrranê, dedens lo bachèt Levantin. Quand ben que Cipro seye geograficament prôcho de la règion du Prôcho-Oriant, lo payis est rapondu culturalament et politicament a l’Eropa et pués est membro de l’Union eropèèna (UE). La sina capitâla et sina ples granta vela est Nicosia.

Dês 1974, lo tièrs enversenc de l’ila, que sè trôve en-delé la legne vèrda (déta « legne Atila ») controlâye per les tropes de l’ONU, est desot contrôlo turco, pués-cen en 1983, cél tèrritouèro sècèssionisto s’est procllamâ rèpublica turca de Cipro de Bise (RTCB). Cela dèrriére est pas recognua per l’Organisacion de les Nacions unies. Cipro est cognua ègzèrciér de jure la sina sôverenetât sus l’ensemblo de l’ila — muens Acrotiri et Dèquèlia, les doves bâses militères sôverènes britaniques — cen vôt dére dessus un tèrritouèro vers los 9 000 km² ; portant contrôle en pratica ren que la partia miéjornâla, seye a pou prés 61 % du tèrritouèro (5 896 km²) que fôt étot sotrère la supèrficie controlâye per los câscos blus de l’ONU (la legne vèrda), que reprèsente d’ôrdre de 3,7 % du tèrritouèro.

Los habitents s’apèlont los Cipriotos [lu si.pri.ˈjɔː.to] et les Cipriotes [le si.pri.ˈjɔː.te, le si.pri.ˈjɔːt].

Liére la suita