Capitâla
|
Cél articllo est ècrit en arpetan supradialèctâl / ORB lârge. | 
|
Cél articllo pôrte sus la significacion de la parola capitâla u sens de vela que dirige un payis. Por les ôtres significacions, vêde Capitâla (homonimia).
Na capitâla (du latin caput, capitis, téta) est na vela yô qu’est assietâye los povêrs, ou ben na vela qu’at na supèrioritât dens un domêno sociâl, culturâl, èconomico ou ben sportif. Dens cél câs, prèjont avouéc de mètropola.
- Payis que la capitâla est coutiére.
- Payis que la capitâla est pas coutiére.
- Payis pas coutiérs.
- Payis qu’ant un mouél de capitâles.
- Payis qu’ant aviu un mouél de capitâles en arriér.
Lo tèrmo capitâla solèt dèsigne sovent la capitâla d’un Ètat, vela yô qu’est assietâye g·ènèralament los povêrs nacionâls. Portant, dens doux-três payis, la capitâla constitucionâla est pas la sièta de les enstitucions, notament los Payis-d’Avâl, que la capitâla est Amstèrdame quand ben que totes les enstitucions sè trôvont a L’Hage.
Dens quârques payis constituâs d’una fèdèracion d’Ètats, châcun de lor at sa capitâl’a sè et pués lo payis at na capitâla fèdèrâla. D’ense, ux Ètats-Unis, Sacramento est la capitâla de la California et Washington, D.C. la capitâla fèdèrâla, coment Quèbèc est la capitâla du Quèbèc et Ottawa la capitâla du Canada.
Dens un mouél de payis, notament dedens lo mondo angllo-saxon, la capitâla politica est luen d’étre la vela la més poplâye. O est lo câs ux Ètats-Unis tant u nivél fèdèrâl que fèdèrâ, mas asse-ben u Canada, en Ôstralia ou ben en Novèla-Zèlanda. Washington est d’ense ben més petiôta que Niou-Yorque, Sacramento que San Francisco ou ben Los Angeles, Tallahassee que Miami, Bâton-Rojo que La Novèla-Orliens, Ottawa que Toronto ou ben Montreyâl, Canberra que Sydney, Wellington que Auckland. Y at que prèjontnt d’alyor a propôs de cél fenomèno de « capitâles administratives » ou ben « capitâles a l’amèriquèna ».
Lo tèrmo ch·èf-luè est étot empleyê dens doux-três payis por dèsignér la capitâla d’una division administrativa.