Vouiquipèdia:Lumiére dessus…/Chemin de Fèr du Levant de Liyon
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês la demenge 17 d’avril 2022 tant qu’u dejô 21 d’avril 2022.
Le Chemin de Fèr du Levant de Liyon [θy.ˈmɛ̃ də fɛ du lə.ˈvã də li.ˈjɔ̃] (CFLL) (le Chemin de fer de l’Est de Lyon (CFEL) en francês) est una vielye baragne fèrrovièra secondèra francêse a charriére de tren normala en Arpetania, qu’est a mêtiêt dediens le dèpartament du Rôno et a mêtiêt dediens le dèpartament de l’Isera et pués rapondéve la gâra de Liyon-Levant a Aoûta - Sant-Genés per Crèmiô, Sant-Alèro-de-Brens (fôrche por l’antèna de Jalyô) et Solemmiô - Sabloniéres (fôrche por l’antèna de Montalor).
Aprés una fin d’èxplouètacion progrèssiva dês qu’en dècembro 2003, l’emprêsa de la legne contenua entre-mié la gâra de Liyon-Pârt-Diô et Mêsiô Z.E. est étâ transformâ por pèrmetre d’y fére circular la legne T3 du tramevê de Liyon, et pués la navèta Rônèxprès por l’aèrogâra Sant-Ègzupèri. A notar por cél dèrriér, que dapués la Z.E. de Mêsiô, la charriére de tren lèsse la vielye emprêsa du CFLL por sè veriér u mié-jorn vers l’aèrogâra.