Vouiquipèdia:Lumiére dessus…/Cabrèta
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês la demenge 17 de dècembro 2023 tant qu’u demécro 20 de dècembro 2023.
La cabrèta [ka.ˈbrɛ.ta, ka.ˈbʀɛ.ta] (ou ben la musèta [my.ˈzɛ.ta]) est ‘n enstrument a sofllèt de musica tradicionâla ârvèrgnata de la famelye de les cancôrnes a enche droblo et composâ d’un cabas de chiévra que lo nom cabrèta tire son origina. La cabrèta a boche est na vielye fôrma de la cabrèta que sè méne pas més orendrêt. La cabrèta a sofllèt est aparua u XIXémo siècllo dedens la comunôtât ârvèrgnata de Paris, s’est pués vito èpatâye en Ârvèrgne, notament dens lo Chantâl, et pués dens los ôtros hiôts payis a l’entôrn. Enstrument principâl de les borrèyes et dances folclloriques, la cabrèta est asse-ben menâye dens los orquèstros et dens de bendes de musiques d’ora per los cabretêros. En France, la transmission de cél savêr est assurâye per de consèrvatouèrs et d’associacions. La pratica de la cabrèta est étâye enscrita sus l’Enventèro du patrimouèno culturâl imatèrièl en France, dês 2017.