Rochiér nêre
Montagne magnètica
|
Cél articllo est ècrit en arpetan supradialèctâl / ORB lârge. | 
|
Por los articllos homonimos, vêde Rochiér.
Lo Rochiér nêre (du latin Rupes Nigra) ou ben la Montagne magnètica (de l’alemand der Magnetberg) est n’ila fantôma montagnosa de 53 km de long, fêta de roche nêre magnètica, que sè crèyéve que sè trovâve u polo Nord magnètico. L’ègzistence de cel’ila prètegnéve èxplicar porquè totes les boussoles pouentâvont a cél endrêt.
L’idê est aparua dedens n’ôvra pèrdua qu’at nom Inventio Fortunate d’origina pas de sûr, que dâte probâblament du XIVémo siècllo, et pués l’ila aparêt dessus les mapes du XVIémo et XVIIémo siècllos a côsa de son importanta portâ, celes de Gérârd Mèrcator et sos succèssors avouéc.
Lo mémo Gérârd Mèrcator est arrevâ a reprèsentar la Rupes Nigra dens son atlâs postumo publeyê en 1606, qu’avéve dedens la premiére mapa de l’Artico. De ples, dèssinâve quatro petiôts continents a son alentôrn, étot fantasticos, plongiês dedens ‘n ocèan agitâ.
Dens l’ôvra de Julo Vèrno, Les Aventures du capitèno Haterâs (1866), lo polo Nord est ocupâ per l’ila de la Rêna, fêta per un volcan (lo mont Haterâs) u franc méten de la mar libra du polo.