Queréla dels Ancians et dels Modernos

La queréla dels Ancians et dels Modernos êt una queréla littèrairi qui comencet eu siéglo XVIIo quand Charles Perrault affirmet a l'Acadèmie franceisi que los Anticos, bin qu'il fussant grands et inspiránts, érant dêpassás et que los êcrivans et artistes modernos lor érant supèriors. Una partía dels êcrivans preisiront adonc lo partí de Perrault, qui argave que los Anticos érant païans et que lors ovres érant sovend triviales et griveises quand los Modernos haviant mais de goût, et una altra partía preisit lo partí des Anticos quomment Boileau et Racine qui pensavant que los Anticos érant de modélos qui no devíant être mêpriziés por lor antiquitá mais qui haviant trová de thémes universals de rèflection qui poyiant servir à totes les èpocques.

Lo comenciment

Eu comenciment de la queréla se trovont mouts factors. Lo poyeir reyal volt contrôlar los Arts por faire luire la Franci de prestigeo deis l'època de Richelieu et de Louis XIII. Les premiéres tensions êclatont quand d'artistes suggéront que los thémes mythicos anticos sont dêpassás et d'una moralitá bassa et qu'hoy seriet plus utilo de consacrar l'art eus thémes chrêtians et patrioticos qui mettont en valor la moralitá publica et la gloiri de la Franci. Hoy êt la queréla du mèrivèlyós chrêtian.

Lo Cid de Corneille fait escandalo quand el pareît en 1637 : les régles anticques no sont gins respectáes et los thémes sont accusás d'être antipatrioticos et immorals.

Lo dêclenchiment

La queréla êclate en 1664 quand Jean de la Fontaine fait publiar Joconda ou l'infidèlitá de les femnes, una repreisi de l’Orlando furioso d'Ariosto. En meîmo temps, los Modernos accusont L'êcoula de les femnes de Molière d'oltradgier la pudor et de donar de mauvais modélos a la sociètá franceisi. Los Modernos obtignont que les inscriptions sur lo monument deu régno de Louis XIV fussant êcrites en franceis et non plus mais en latin.

Lo discors de Perrault a l'Acadèmie

En 1687 Charles Perrault prononce un cèlébro discors a l'Acadèmie franceisi qui demore emblèmatico de la queréla, el judge que los Modernos sont supèriors en moralitá quar il sont chrêtians et vivont dins un Reyalmo prestigiós ond les mors sont protègiées per lo Rei, el fait l'èlogeo deu Rei contre los tyrans anticos.

Los dous partís

• Los Anticos, emmenás per Boileau, sôtignont una thèorie de la conception littèrairi qui repose sur lo respect et la justa apprèciation de l'hèritadgeo antico. Por lor, lo judgiment deu publico et la postèritá fant les ovres, et los ovres anticques sont donc bones quar elles passéront celá êprova deu temps. Modélos èternals donc. Tuis los partisans dels Anticos recognoisçont la valor dels contemporans - Boileau diziet que Corneille, Racine et Molière seriant de modélos por los siéglos a venir - mais la valor no pot être fermament cognöua qu'avoi lo temps. Los Anticos hant por lor molts grands noms quomment La Fontaine.
• Los Modernos, emmenás per Perrault, sôtignont que lo siéglo en quei il vivont êt supèrior a tuis los siéglos que los altros autors cognöuront et que la production artistica d'un siéglo chrêtian no poyiet mais qu'être supèriora a cella d'un siéglo païan. Il volont una littèratura de lor siéglo avoi de thémes chrêtians, morals ou qui prédgeont de la gloiri de la Franci. Êt una littèratura por duire la sociètá, tota pèdagogica, que volont. Il volont una littèratura que seie complaizanta avoi la Cort de Franci, respectuosa de la bienséance, zeláe por la religion, fuyent les libertáes anticques - judgiées immoralas - et qui cerche tot-jors a cèlèbrar la monarchie et l'Egleisi. Los Modernos hant por lor l'Acadèmie, lo partí dèvot, los salons littèrairos.