Mechiél Crox

Cél articllo z-est ècrit en arpetan savoyârd / ORB lârge.

Mechiél Ôgusto Crox (en francês Michel Auguste Croz; Chamôni, 22 d’avril 1830 - Grant-Bèca, 14 de j·ulyèt 1865) ére un arpinisto arpetan et guido de montagne.

Mechiél Crox.

Guido d'hôta montagne famox, il at acompagnê de nombrox pioniérs de l'arpinismo angllês entre 1859 et 1865, participant a de nombroses premiéres èlèvacions, que lo Mont Viso, lo Mont Dolent et la Grant-Bèca: pendent ceta dèrriére entreprêsa, il est môrt per accident.

Activitâts coment guido de montagne

Nèssu u Tôrn, un velâr de Chamôni, Crox at comenciê a travalyér coment guido d'hôta montagne en 1859, quand il at étâ engagiê per William Mathews (fondator du Clube arpenc angllês) por n'èlèvacion du Mont-Bllanc. Il at acompagnê justo aprés, avouéc son frâre Jean-Baptiste Crox, los frâres Mathew d'ètot dens les doves campagnes successives de 1860 et 1861, qu'ant culminâ avouéc la premiére èlèvacion du Mont Vésol. Aprés cen, il rejuend coment guido d'ôtros arpinistos du calibro de Francis Fox Tuckett et Edward Whymper, rèalisant, outre de nombroses premiéres èlèvacions (permié qu'on pôt citar, outre lo Mont Vésol précité, lo Grant Damâjo, la Bârra des Ècrins et l'Agouelye d'Argentiére), que plusiors premiéres travèrsâs de colenes tant qu'alor vièrges, coment lo Col des Ècrins, lo Col du Sélé et lo Col du Gllaciér Blanc dens lo Massif des Ècrins (1862, avouéc Tuckett, Peter Perren et Bartolomeo Peyrotte).

Grant-Bèca

Gustavo Doré : Môrt des arpinistos a fllanc de la Grant-Bèca, lo 14 de j·ulyèt 1865.

En 1865, Mechiél Crox rejuend l'èxpèdicion menâye per Edward Whymper que tente la premiére èlèvacion de la Grant-Bèca dês la Crèta de l'Hörnli. L'èxpèdicion compregnêt, outre Crox et Whymper, Charles Hudson, Lord Francis Douglas, Douglas Robert Hadow, et les doves guides de Prât-Borgno Peter Taugwalder pâre et fils. L'èxpèdicion at reussi a avengiér lo sonjon lo 14 de julyèt 1865. U retôrn, Hadow, second de la cordâye, colate, borre Crox qu'est en téta, l'entrêne tot du long de la face nord en surplomb de la Grant-Bèca ; los doux ant entrênâ asse-ben dens lor chête Lord Douglas et Hudson avouéc, pués la côrda qu'unéssêt les sèpt s'est rontua tandis que Whymper et les doves Taugwalder ant reussi a s'acrochiér ux roches. Lo côrp de Mechiél Crox, retrovâ quârques jorns més târd, est entèrrâ u cemetiéro de l'égllése de Prât-Borgno.

Premiéres èlèvacions

Il at fêt la premiére èlèvacion des montagnes que siuvont:

• Agouelye de la Granta Sassière avouéc William Mathews - 5 d'oût 1860;
• Grande Casse avouéc William Mathews et Ètièno Fâvro - 8 d'oût 1860;
• Mont Gelâ avouéc Frederick William Jacomb et Jean-Baptiste Crox - 11 d'oût 1861;
• Mont Pourri avouéc William Mathews et Frederick William Jacomb - 13 d'oût 1861;
• Castor avouéc Frederick William Jacomb et William Mathews - 23 d'oût 1861;
• Mont Vésol avouéc Jean-Baptiste Crox, Frederick William Jacomb et William Mathews - 30 d'oût 1861;
• Bârra des Ècrins avouéc Adolphus Warburton Moore, Horace Walker, Edward Whymper, Christian Almer viely et Christian Almer joueno - 25 de jouin 1864;
• Mont Dolent avouéc Edward Whymper, Anthony-Adams Reilly, Henri Charlet et Mechiél Payot - 9 de julyèt 1864;
• Agouelye d'Argentiére avouéc Anthony-Adams Reilly, Edward Whymper, Henri Charlet et Mechiél Payot - 15 de julyèt 1864;
• Grand Cornier avouéc Edward Whymper, Christian Almer et Franz Bèchiér - 16 de jouin 1865;
• Pouenta Whymper sur les Grantes Jorasses avouéc Edward Whymper, Christian Almer et Franz Bèchiér - 24 de jouin 1865;
• Grant-Bèca avouéc Edward Whymper, Lord Francis Douglas, Douglas Robert Hadow, Charles Hudson et Peter Taugwalder pâre et fils - 14 de julyèt 1865

Comèmoracions

Monument de tomba a Prât-Borgno.

Yon des sonjons des Grantes Jorasses est dèdiê a Mechiél Crox: La Pouenta Crox (4 110 m).

Sa vela natâla, Chamôni, lui at dèdiê na charriére centrâla, lo Cors Mechiél Crox (en francês Avenue Michel Croz). Yon des més ancians bâtiments de Chamôni, la Sâla Mechiél Crox, que lui ére dèdiêe, at étâ dètruita per un fuè lo 15 de fevriér 1999.

La tomba de Mechiél Ôgusto Crox sè trôve pués a Prât-Borgno.

Bibliografia

• Marcel Pérès, « La cordée royale. Edouard Whymper et Michel Croz, le prince des guides », Chamôni 2011.