La Pastorala/Le berdzé

La Pastorala/Le berdzé est una chançon de chalendes en patouès valdotèn de l’abbé Jian-Baptiste Cerlogne.

Téxto

« De nët euna leumiére
I berdzè l’at paru;
Un andze vin leur dëre:
Lo Sauveur l’est neissu.
Un pouro baou l’est son palatse,
Et sat pei de fen in traver
Compouson lo deur matelatse
De ci gran Rei de l’univer;
Et din la rigueur de l’iver
De dò trei lindzo l’est queuver.
Un pouro

Berdzé, dei que le s-andze
Di cheil son descendu,
Pe tsanté le lovandze
D’un meinà vouë neissu;
Parten! parten! L’est dzà doz’aoure;
Galopen a Betheleen.
No verren ci meinà que plaoure
Din euna rètse su lo fen.
Que ci petsou deit ëtre dzen!
Më que l’est pouro in mëmo ten!
Parten, etc.

Quetten noutra cabanna,
Agnë, feye et maouton;
Beissen bà din la plana
Tsertsé ci dzen popon.
A ci meinà din la misére,
No fat lei porté de presen,
Afin que le jeu de sa mére
Le veyen pa todzor souffren.
No fat lei porté de creissen,
Et de lassë lo tsanon plein.
A ci meinà, etc.

O berdzé, vo lo veide:
Ah! Lo pouro meinà!
Din cetta nët se freide
Su de fen l’est coutsà.
Binque le rei, din l’abondance,
Passon leur dzor din le pleisi
L’Infan Jesu, din la souffrance
L’at case ren pe se creuvi.
Et l’est per nò que vout souffri,
Et que vout nëtre din l’oubli.
Binque, etc.

Mon Dzeu, v’ei voulu nëtre
Din un fran pouro andret!
Sensa vitre i fenëtre
Vo poude avei bien fret.
V’ei pe tot tsaat dove bëtsette
Que soufflon contre voutre pià,
Et de dò bocon de feissette
Pouramen v’ëte immaillotà,
Afin de reparé lo mà
Que no s-an fé noutre petsà.

Le rei, din leur palatse,
Retsertson le s-onneur;
Et l’Infan Jesu catse
Din un baou sa grandeur.
Son esemplo no fet comprendre
Qu’in ci mondo n’en a souffri,
Et no s-ingadze tseut a prendre
Lo tsemin dret di paradi.
Ci que meprise le pleisi,
L’or et l’ardzen, l’est son ami.

Perden un son eretadzo,
Lo premië pére Adan
L’at fet, din l’esclavadzo,
Plaouré tseut se s-infan.
Më pe bonneur vouë vint de nëtre
Lo Sauveur promi dei gran ten.
I vin de se fére cognëtre
A de berdzé pouro, ignoren.
De sa veneuva achuremen,
Lo dzablo l’est pa trop conten.
Më pe, etc. »

Bibliografia

• Valdôtains, chantons! (1932)