Cortenèro
Los Cortenèros (en latin Cortinarius) fôrmont yon des més grants genros de champegnons, probâblament lo més grant genro de champegnons "supèriors". Ils sont des agaricales distingâyes per lo vouèlo parcièl en aragnê (des côps pejolu), nomâ cortina (= rediô) en latin, que reliye lo pied u chapél et empare les lames avant l'uvèrtura du champegnon. Les spores sont d'un bron de roulye et pôrtont des vèrrues. Los cortenèros sont des champegnons èctomicorizicos, que vivont donc en simbiose avouéc los âbros.
_Gray_18241_crop.jpg)
Cortenèro violèt
On at dècrit més de 2000 èspèces de cortenèros. Los travâlys gènèticos ant pèrmês de rèunir cèrtênes èspèces, mas on en dècôvre de novèles a mesera, que sont gènèticament confirmâyes.
On trôve des cortenèros dens tôs los bouescs tempèrâs de la planèta et mémament dens les jors des tropicos. On en trôve asse-ben dens los prâts des hôtes montagnes, en liêson avouéc les sôges nènes. On pôt d'ense considèrar que ceti genro est cosmopolito.
Por l'homo cèrtênes èspèces sont megiâblos et mémament rechèrchiêes, quârques-unes sont mortèles. Cetes-ce provocont des entoxicacions ux simptômos d'atant més dangerox qu'ils sont tardifs (sovent plusiors jorns aprés la consomacion) et que los damâjos fêts ux rens sont irrevèrsiblos. Plusiors de cetes èspèces poueson ègzistont dens los payis arpetans, yô els ant fêt des victimes.
