Jorn de l’an

Bon-an, An novél

Cél articllo est ècrit en arpetan supradialèctâl / ORB lârge.

*Fuè d’artificio du jorn de l’an* a Sydney en 2006.

Lo jorn de l’an [ˌdzɔr.də.ˈl‿ã, ˌðɔ.də.ˈl‿ã, ˌʒɔr.də.ˈl‿ã] ou [ˌdzɔʀ.də.ˈl‿ã,
ˌʒɔʀ.də.ˈl‿ã] — diont pletout lo bon-an [bɔ.ˈnã] en Romandia — ou ben l’an novél [ˌã.nɔ.ˈve] est lo premiér jorn de l’an. Per èxtension lo tèrmo dèsigne asse-ben les cèlèbracions de ceti premiér jorn de l’an^[1].

Coment tota dâta anivèrsèra sus un calendriér balyê, lo jorn de l’an pôt étre na dâta bugeniére sus ‘n ôtro calendriér que fonccione d’aprés n’ôtra logica. Per ègzemplo, lo jorn de l’an du calendriér chinouès (leni-solèro) est na dâta bugeniére sus lo calendriér grègorien (solèro).

Rêsons de la cèlèbracion

Dens la filosofia modèrna, por Mircea Eliade, la cèlèbracion du jorn de l’an corrèspond u renovèlament que sè fât tôs los ans de la cosmogonia de les origines, que retrôvont dens totes les civilisacions primitives, et pués que pèrmèt de retrovar la plènituda du mondo primitif^[2].

Difèrence entre los calendriérs

Dens los payis tempèrâs, quand ben que lo « Jorn de l’an » chêt pas sovent a la méma dâta d’un calendriér a l’ôtro, remârcont na concordence relativa. En èfèt, la disparicion de la vègètacion pendent l’hivèrn et la sina renèssence u forél ant nurri lo concèpto franc èpatâ de la « renèssence cicllica » de l’an. O est vêr pas ètonant qu’un mouél de « Jorn de l’an » seye fétâ entre-mié lo solstiço d’hivèrn et l’èquinoxo de forél.

Portant o est pas du tot univèrsâl, puésque dens los payis tropicâls, lo cicllo de les sêsons est prôd muens visiblo. D'ense l’Ègipta antica, quand ben qu’emplèye un calendriér civilo solèro, féte l’an novél a l’arrevâ de l’égouâna du Nil. Cel’égouâna, diua a les ploges que sè pâssont lé-outre dedens los hiôts platéls, at na dâta tota tributèra de fenomènos du temps. Gènèralament, arreve portant adés u mémo temps.

Notes et rèferences

Notes

Rèferences

— Principâles

(fr) Rogiér Verèt, Dikchonéro Fransé - Savoyâ - Dictionnaire Français - Savoyard [PDF], 10^éma èdicion reviua et ôgmentâ, 2023, pp. 254 [→ l’zhò d’l’an], 2129 [→ l’zhò d’l’an] et 2155 [→ l’zhò d’l’an].

— Suplèmentères

↑ (en) « Best Places To Celebrate New Year’s Eve », dessus ArrestedWorld (viu lo 2 de novembro 2020).
↑ (fr) Mircea Eliade, Aspects du mythe, Paris, Gallimard, « Idées », 1963 ; rèd. « Folio essais », 1988 (ISBN 2-07-032488-5).

[1] (en) « Best Places To Celebrate New Year’s Eve », dessus ArrestedWorld (viu lo 2 de novembro 2020).

[2] (fr) Mircea Eliade, Aspects du mythe, Paris, Gallimard, « Idées », 1963 ; rèd. « Folio essais », 1988 (ISBN 2-07-032488-5).

[1]

[2]