Vouiquipèdia:Lumiére dessus…/Nombro
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demârs 11 de mê 2021 tant qu’u dessando 15 de mê 2021.
Un nombro est un concèpto matèmatico que pèrmèt d’èstimar et de comparar de quantitâts ou ben de rapôrts de grantiors, mas asse-ben d’ordonar de piéces per na numerotacion d’aprés lor rang. Sovent ècrits avouéc yon ou ben un mouél de chifros, los nombros sè mècllont per lo biès d’opèracions que sont rèsumâyes per de règlles de carculo. Les propriètâts de celes relacions entre-mié los nombros sont adés trètâyes dens lo câdro de l’aritmètica des entiérs, pués-cen ples larjament u méten de plusiors branches de la tèoria des nombros.
En l’absence d’una dèfenicion gènèrâla satisfassenta de cela nocion, doux-três tipos de nombros sont étâs fêts rentrar, d’entiérs naturâls ux nombros rèèls, et pués en-delé avouéc d’ôtres chouses coment los nombros complèxos, los nombros p-adicos, d’enfenitèsimâls de l’analisa pas estandârd ou ben de transfenis de la tèoria des ensemblos. Celos concèptos que pèrmètont d’èxprimar de meseres fesiques, de trovar la solucion d’èquacions, d’encodar d’enformacions, vêr de comprendre l’enfeni.