Vouiquipèdia:Lumiére dessus…/Cllarèta de Dia
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demârs 1ér de fevriér 2022 tant qu’u dessando 05 de fevriér 2022.
La cllarèta de Dia (la clareta de Diá en occitan, la clairette de Die en francês) est un vin èfèrvèscent d’apelacion d’origina controlâye du vegnôblo de la valâ du Rôno et més ègzactament de la valâ de la Droma dedens lo Dârfénât.
L’origina de cél vegnôblo remonte tant qu’a l’Antiquitât. La citât de Dea Augusta Vocontiorum (Dia) fut yona de les més importantes de la Gôla narbonêsa. Plinio lo Viely cite franc favorâblament lo vin des Voconços. Nen distingue doux : l’aigleucos, qu’arrètâvont la fèrmentacion en plongient les dolia dedens l’égoua frêda tant qu’a l’hivèrn, et pués lo vinum dulce.