Micèlion

Lo micelion est l'aparèly vègètatif des champegnons ou de cèrtênes bactèries filamentoses coment los Actinomycètos (Streptomyces, Mycobacterium...). En gènèral pou visiblo, il est composâ d'un ensemblo de filaments, més ou muens ramifiâs, apelâs hifes, qu'on trôve dens lo sol ou lo substrat nutritif.

A la surface du sol lo micelion pôt prendre l'aspèct d'un fetrâjo; on pôt lo vêre asse a la bâsa du pied de cèrtins champegnons. Chiéz cèrtênes èspèces les hifes sont rassemblâyes en cordons sovent entourâs d'un cortèx, que balyont l'emprèssion de racenes et qu'on apèle por cen rizomorfos.

Chiéz ben des champegnons lo micelion primèro, haployido, vint d'una spora; il vat s'assemblar avouéc un ôtro micelion primèro compatiblo por balyér un micelion segondèro tèoricament diployido, quand ben, fêt unico chiéz los étres vivents, la fusion des noyôs sè tindrat que ben més târd, dens lo carpoforo (aparèly reproductor, que corrèspond a cen que lo public apèle "champegnon"), justo avant la formacion des spores durent la mèiose.

Lo micelion assure lo crêt vègètatif (dens lo substrat) du champegnon, il lui pèrmèt asse de trèsir de nombroses et variâs èssences nutritives a côsa de les enzimes spècialament pouessientes.

Chiéz de nombroses èspèces (Amanites, Bolèts, Chanterèles...), lo micelion vat formar des orgânos comons avouéc les plantes u nivél de lors racenes: o est cen qu'on apèle les micorizes, yona des simbioses més importantes du mondo vivent.

Lo micèlion est utilisâ por la cultura des champegnons: fôt "ensèmenciér" lo substrat avouéc du micelion frès sovent apelâ "blanc de champegnon".

Micelion de Pleroto en ouitra (Pleurotus ostreatus) cultivâ sur du câfè molu