Gènocido armènien

Lo gènocido armènien, ou més prècisament lo gènocido des Armèniens, est un gènocido fêt d'avril 1915 a julyèt 1916, u cors de loquint los doux tièrs des Armèniens que vivant alor sur lo tèrritouèro actuèl de la Turquie ant pèri a côsa de dèportacions, famenes et massacros de granta amplor. Il at étâ planifeyê et ègzècutâ per lo parti u povêr a l'època, lo Comitât Union et Progrès (CUP), més cognessu sot lo nom de « Jouenos-Turcos », composâ en particuliér du trionvirat d'oficiérs Talaat Pachâ, Enver Pachâ et Djemal Pachâ, que dirigiêve l'Empiro otoman adonc engagiê dens la Premiére Guèrra mondiâla ux fllancs des Empiros centrâls. Il at côtâ la via a enveron un milyon doux cent mile Armèniens d'Anatolie et d'Armènia occidentâla.
La ciba du gènocido ére lo nèteyâjo ètnico de l'ètat turco, en èliminant surtot les populacions crètienes; èfèctivament d'ôtros crètiens, siriacos en particuliér, ant cognessu lo mémo sôrt.
L'actuèla rèpublica turca refuse d'accèptar l'ègzistence de ceti gènocido, qu'est portant recognessu houé per una trentêna d'ètats, avouéc la France et los Ètats-Unis, payis yô los dèscendents de rèfugiyês armèniens sont spècialament nombrox.

Tétes dècapitâyes de huét profèssors armèniens massacrâs per los Turcos, posâyes sur des ètagiéres

Mèmoriâl du gènocido a Yèrèvan (Armènia)

Payis qu'ant recognessu lo gènocido (vèrd sombro: parlement nacionâl, vèrd cllâr: parlements locals)